FROM COAST

ASKARI wa jeshi la polisi jijini Dar es Salaam amedaiwa kumpiga risasi Hassani Likanoga (24), mwanafunzi mtarajiwa wa Chuo Kikuu cha Dar es Salaam wakati alipokuwa wakipiga risasi gari moja lililodhaniwa kuwa ni la majambazi.

Tukio hilo la kusikitisha lilitokea Julai 10 mwaka huu majira ya saa nane mchana katika eneo la Tandika jijini Dar es Salaam wakati polisi walipokuwa wakifukuza gari hilo aina ya Toyota RAV 4.

Mashuhuda wa tukio hilo waliliambia Mwananchi kuwa, eneo la mtaa wa Mbwela uliopo Tandika uligeuka na kuwa Darfur kwa muda wakati mirindimo ya risasi ilipokuwa ikirushwa kutoka kwenye gari la polisi kuelekea kwenye gari lililokuwa mbele lililodaiwa kuwa ni la majambazi.

Mmoja wa mashuhuda wa tukio hilo Shabani Ramadhani aliliambia Mwananchi "Nikiwa kibarazani nimekaa niliyaona magari matatu yakifukuzana, gari moja ndogo aina ya Toyota RAV 4 likiwa limetangulia na limefunga vioo vyote na nyuma yake kulikuwa na magari mawili, moja likiwa ni la polisi na jingine lilikuwa Suzuki ambalo baadaye niligundua kuwa lilikuwa likitumiwa na polisi."

Alisema risasi hizo zilianza kurushwa muda mfupi baada ya magari hayo kuacha barabara ya lami inayoelekea Tandika na Mwembe Yanga na kuelekea barabara ya Vumbi inayokatisha mtaa wa Mbwela.

Alisema risasi hizo ambazo zilianza kurushwa mfululizo zililifanya eneo hilo kuwa katika hali ya hatari kwani zingine zilirushwa juu, nyingine chini na nyingine zililenga usawa wa gari walilokuwa wakilifukuza.

"Risasi hizo ambazo muda wote zilipigwa ovyo nyingine zilipigwa juu na nyingine chini huku nyingine zikilenga gari walilokuwa wakilifukuzia zikitokea kwenye gari la polisi ambalo nyuma yake kulikuwa na askari wawili tu,"alisema Ramadhani.

Alisema muda mfupi baadaye aliona mtu akianguka chini baada ya kupigwa risasi iliyotoka kwenye gari la polisi na ulipotoweka msafara huo walikwenda kumwangalia na kukuta marehemu akiwa amejeruhiwa sehemu ya shingoni huku damu ikimtoka kwa wingi.

Alisema baada ya tukio hilo lilijitokeza kundi kubwa la wasamaria wema akiwamo yeye na kwenda kutoa msaada kwa kijana huyo kwa lengo la kumpeleka hospitalini.

"Ingawa tulikuwa hatumjui, lakini kwa tukio lile tuliloliona sote tulijua wazi kuwa hakuwa jambazi, hivyo umati mkubwa watu ulilazimika kukimbnilia hapo na kuanza kutoa msaada wa kila namna ikiwa ni pamoja na kufanya juhudi za kumkimbiza hospitalini," alisema Ramadhani.

Kwa upande wake George Kiondo alifafanua kuwa kazi ya kumtafutia usafiri kijana huyo iligeuka kuwa ngumu baada ya magari yaliyokuwa yakipita katika eno hilo kukataa na kukimbia.

"Tulisimamisha gari la kwanza likakimbia, tukasimamisha la pili likakimbia ndipo tulipoamua kwa umoja wetu kutanda barabarani na kuzuia magari yote yaliyokuwa yanapita hapo kisha tukafanikiwa kumnyang'anya ufunguo dereva mmoja na kumlazimisha kumpakia kijana huyo kwa ajili ya kwenda hosptalini," alisema Kiondo.

Kiondo alibainisha adha nyingine waliyokutana nayo kuwa walipokuwa wakijitayarisha kumpakia kijana huyo gari lililodaiwa lilikuwa likitumiwa na Polisi aina ya Suzuki lilifika katika eneo hilo na kushuka askari mmoja kisha kuanza kufyatua risasi hewani huku akiwataka watu wote kutawanyika.

Kiondo alisema tulisikia sauti ikisema "Tawanyikeni sitaki kuona mtu katika eneo hilo ondokeni haraka" akimnukuu askari huyo anayedaiwa alikuwa akifyatua risasi hewani.

Alisema kizaazaa hicho kiliwalazimu umati mkubwa wa watu waliokuwa wakijaribu kutoa msaada kwa kijana huyo kukimbia hivyo kubaki idadi ndogo ya watu waliosimama na kumsisitiza askari huyo kuwa eneo hilo halikuwa na ujambazi bali wao wanashughulikia suala la kumpeleka kijana aliyekuwa amejeruhiwa kwa risasi hospitalini.

Alisema baada ya polisi huyo kuelezwa hivyo alirudi kwenye gari na kuondoka na ndipo wao walipompakia kijana huyo kwenye gari na kumpeleka kituo cha polisi cha Chang'ombe ambako walipewa PF3 na kumpeleka kijana huyo katika hosptali ya Temeke kwa ajili ya matibabu.

Mwananchi alipomtafuta Kamishna msaidizi wa Polisi na kamanda wa Kanda maalumu ya Dar es Salaam Sulemani Kova alisema,"Kwa kuwa tukio hilo limetokea Temeke wasiliana na Kamanda wa huku atakupa maelekezo yote"

Kamanda wa mkoa wa Temeke Liberatus Sabas alipopigiwa simu mara ya kwanza alijibu akisema alikuwa kwenye gari hivyo kumtaka Mwanandishi kumtafuta baadaye.

MAKAMU Mkuu wa Chuo Kikuu Huria Prof. Tolly Mbwete amewataka wanafunzi nchini kuendelea na elimu ya vyuo vikuu hadi mwisho ili kupunguza pengo kubwa la wasomi nchini.

Profesa Mbwete alisema Tanzania ya sasa inakabiliwa na upungufu mkubwa wa wasomi kuliko wajinga na kwamba kinachotakiwa ni kwa vijana kujifunga vibwebwe katika elimu ya vyuo vikuu.

Alisema kwa mujibu wa utafiti uliofanywa katika mikoa mbalimbali hapa nchini vijiji vingi havina wataalamu wasomi wa elimu mbalimbali hususan ya ufundi.

Profesa Mbwete alisema hayo alipokuwa akizungumza na wanafunzi wa Zoom Poltechinic College kwa niaba ya Waziri wa Mali Asili na Utalii ambapo aliwataka wanachuo hao kusoma kwa malengo ya elimu ya juu zaidi na si kutaka kuishia katika ngazi ya stashahada.

"Katika suala la elimu taifa hili bado tuko nyuma kwa sababu nchi zilizoendelea, kiwango chao cha elimu ni asilimia 40 wakati hapa ni asilimia 10,"alisema Prof. Mbwete.

Alisema utafiti umebaini shida zilizoko vijijini jinsi watu wanavyopata shida ya kupata wataalamu wa kufanya kazi, hali inayowalazimu kutumia gharama kuwatoa mijini kwenda kufanya kazi au kutengeneza kitu fulani.

Alisema jitihada za kupata wasomi wengi zitafanikiwa ikiwa watu wengi wataendelea kuwekeza katika elimu na kwamba lengo liwe kupata wasomi wa taaluma mbalimbali.

Akizungumzia chuo hicho, Profesa huyo alimpongeza Mkurugenzi wa chuo hicho, Gaudios Shija kwa mafanikio aliyoyapata kwa kipindi kifupi tangu aanzishe chuo hicho mwaka 2000.

Hata hivyo aliwataka wanafunzi kutumia nafasi walizopata kusoma kwa bidii ili waweze kuendelea na vyuo vikuu vingine.

source: mwananchi.

Rais Omar Al- Bashir alishtakiwa kwa madai ya ukatili dhidi ya raia katika eneo la Darfur, magharibi mwa Sudan mwezi wa tatu.

Lakini wajumbe katika mkutano wa AU uliofanyika nchini Libya walikubaliana kuhusu azimio linalosema hawatatoa ushirikiano katika kukamatwa kwa Rais Bashir.

Wadadisi wanasema hatua hiyo ina maana kwamba rais Bashir anaweza kusafiri popote barani Afrika ya hofu ya kukamatwa.

Serikali ya Sudan imekuwa ikipigana na waasi katika jimbo la Darfur tangu mwaka 2003.

Mahakama ya ICC inamshtaki Rais Bashir kwa makosa mawili ya uhalifu wa kivita ; kuagiza kushambuliwa kwa raia na uporaji , pamoja na mashtaka mengine matano ya uhalifu dhidi ya binadamu , mkiwemo mauaji , ubakaji na utesaji , yote hayo yakihusishwa na mzozo huo.

Ameyakanusha mashtaka hayo yote , akisema serikali inao wajibu wa kupambana na makundi ya waasi.

Kwenye taarifa , AU imeeleza kwamba ombi lake la kuitaka mahakama ya ICC iliyoko mjini The Hague isimamishe kwa muda hoja hiyo ya kukamatwa kwa Rais Bashir limepuuzwa.

Taarifa jiyo inasema : '' Umoja wa Afrika hautatoa ushirikiano kuhusiana na hoja ya kukamatwa au kujisalimisha kwa Rais wa Sudan Omar Al- Bashir kwa mahakama ya ICC.''

Mwandishi wa BBC anasema ingawa taarifa hiyo imeungwa mkono na viongozi wengi wa Afrika , bado kuna nchi kadhaa , zikiwemo Chad na Benin ambazo zinaonekana kutoridhishwa na kauli hiyo.

Pia kumekuwa na maswali kuhusu taarifa hiyo, kwa sababu haijazitaka nchi 30 zilizotia sahihi ya kuundwa kwa mahakama ya ICC kusitisha uhusiano na mahakama hiyo.

Uamuzi huo ulifanyika katika siku ambapo Kenya imekubali kuendelea kushirikiana na mahakama hiyo ya ICC , kuwashtaki wale wanaotuhumiwa kwa kuchochea ghasia zilizofuatia uchaguzi wa mwezi Disemba mwaka 2007.

Watu wa watatu wamefariki dunia na mmoja kujeruhiwa vibaya katika ajali za barabarani zilizotokea katika maeneo tofauti Jijini Dar es Salaam jana.

Akizungumzia kuhusiana na tukio la kwanza, Kamanda wa Mkoa wa Kipolisi wa Kinondoni, Mark Kalunguyeye amesema lilitokea saa 9:30 usiku wa kuamkia jana katika barabara ya Haile Selasi, maeneo ya Oysterbay na kulihusisha gari aina saloon lenye namba za usajili T 555 AJV.

Amewataja waliofariki kuwa ni dereva wa gari hilo na mkazi wa Upanga, Jalvad Gama , 32 na abiria mmoja mkazi wa Masaki aliyetambuliwa kwa jina la Sailen Gilan, 50. Amesema katika ajali hiyo mtu mmoja aitwaye Gurminber Jandu , 30 alijeruhiwa.

Kamanda Kalunguyeye amesema ajali hiyo ilitokea baada ya dereva aliyekuwa akitokea Masaki kwenda barabara ya Ali Hassan Mwinyi, kushindwa kulimudu gari na kugonga mti.

Amesema miili ya watu hao imehifadhiwa katika chumba cha kuhifadhia maiti cha Hospitali ya Aghakhan.

Amesema majeruhi huyo ambaye ni mkazi wa Masaki na fundi magari, anaendelea na matibabu katika hospitali ya Aghakhan.

Katika tukio la pili, Kamanda wa Mkoa wa Kipolisi wa Ilala, Faustine Shilogile amesema mwenda kwa miguu mmoja amefariki dunia baada ya kugongwa na gari lisilofahamika.

Amesema ajali hiyo ilitokea jana saa 12:15 asubuhi katika eneo la Tazara wakati mwenda kwa mguu huyo ambaye ni mwanamke anayekadiriwa kuwa na umri wa kati ya miaka 30-35, alipokuwa akivuka barabara ya Nyerere.

Amesema gari wala dereva aliyemgonga hakufahamika na kwamba mwili wa marehemu umehifadhiwa katika chumba cha kuhifadhia maiti cha Hospitali ya Taifa ya Muhimbili.

Mazishi ya Mfalme wa Pop Duniani Michael Jackson yamegeuka kuwa 'dili' la aina yake baada ya watu kibao kugombea nafasi ya kuhudhuria shughuli hiyo.

Taarifa zinaeleza kuwa hadi sasa, zaidi ya watu 500,000 wamejisajili kwa ajili ya kucheza bahati nasibu ya kuwania tiketi kiduchu, zinazotajwa kuwa ni 17,500 pekee ili kutoa heshima za mwisho kwa mwili wa Michael Jackson.

Uwanja wa mpira wa kikapu wa Staples Center Jijini Los Angeles ndio utakaotumika Jumanne ijayo kwa shughuli za kumuaga mwanamuziki huyo aliyefariki ghafla Alhamisi iliyopita.

Hata hivyo, wakati watu kibao wakiwania kushiriki mazishi ya mfalme huyo wa pop duniani, familia yake bado haijaeleza ni siku gani hasa atazikwa.

Alikuwa akihutubia mkutano wa maafisa wa afya ulioandaliwa na Umoja wa Mataifa mjini Cancun, nchini Mexico.

Dr Chan alisema hatua ya kufanyika kwa mkutano huo nchini Mexico ambako homa hiyo ilianzia, ni ishara kubwa ya kuwa na imani katika nchi hiyo.

“Mexico ni salama, inavutia na ni pahali penye ukarimu mkubwa.”

Alisema kwamba aina ya ugonjwa huo ya H1N1 si hatari mno kwa kuwa ni rahisi kwa mgonjwa kupata nafuu bila ya matatizo.

“Na hapo ndipo tunakumbana na changamoto; kuwapa watu nasaha ya kuelewa wakati wa kupata huduma za matibabu na wakati wa kutokuwa na hofu,” alisema Dr Chan.

Kenya imeripoti visa tisa vya watu ambao wana virusi hivyo. Wote ni wageni kutoka Uingereza ambako inakisiwa maambukizo yatakuwa mengi.

Uganda nayo pia imetangaza kisa kimoja cha ugonjwa huo.

Viongozi na wataalamu kutoka nchi 50 wanakutana mjini Cancun kwa siku mbili ili kujadili mikakati ya kudhibiti kusambaa kwa virusi vinavyosababisha ugonjwa huo.

Tangu ugonjwa huo kuzuka karibu miezi miwili iliyopita, zaidi ya watu elfu 70 wameambukizwa na zaidi ya mia tatu kufariki dunia.

Mwanamuziki mashuhuri wa Marekani, Diana Ross ametajwa katika wosia wa Michael Jackson kama mlezi wa watoto watatu wa Michael inapotokea mama yake Michael Jackson mwenye miaka 80 atakaposhindwa kuwaangalia.

Hayo yapo katoka Wosia wa Michael Jackson ulioandikwa mwaka 2002 ambao ulikuwa ukisubiriwa kwa hamu, ambapo ulitolewa jana katika mahakama kuu ya Los Angeles, katika wosia huo Michael Jackson hakumtaja mke wake wa zamani Debbie Rowe kuchukua nafasi yoyote ya kuwalea watoto hao.

Katika wosia huo Michael Jackson amesema ndoa yake na Debbie Rowe iliishavunjika na kiuhakika hali hiyo inamzuia Debbie kupata chochote kutoka kwa Michael Jackson.

Michael Jackson ameacha mali yenye thamani ya jumla ya dola za kimarekani zaidi ya milioni 500 kwa familia yake.

Michael Jackson amemtaja mama yake kuwa msimamizi mkuu na mlezi wa watoto wake watatu.

Wosia huo ulipelekwa mahakamani na mwanasheria wa zamani wa Michael Jackson aitwaye John Blanca na kiongozi wa wanamuziki wa zamani John Mclain ambao walikuwa marafiki wa Michael kibiashara, wote wawili katika wosia wa Michael wametajwa kuwa wasimamizi wa mirathi.

Hata hivyo, wosia huo umeshindwa kutoa mwongozo wa masuala kadhaa likiwemo la maziko ya Michael Jackson kwamba atazikwa vipi na wapi au kuhusu utajiri wake utagawanywa vipi.

Vyombo vya habari mbalimbali vilikuwa vikidai leo mwili wa marehemu Michael utaagwa na mazishi yatafanyika siku ya Jumapili taarifa ambazo familia ya marehemu imezikanusha, lakini hawajasema lini nguli huyo wa muziki atazikwa.

Diana Ross mwenye miaka 65 ambaye alikuwa rafiki wa Michael Jackson amesema ," Moyo wangu unauma sana kusikia kifo cha Michael, hivi sasa nipo katika sara kuwaombea watoto wa Michael na familia ya Jackson."

Mwanasheria wa Michael alisema alichelewa kupeleka wosia huo mahakamani kwa sababu alitaka familia ya Jackson kuupitia kwanza.

"Suala la msingi katika wosia huo ni kwamba Michael amemwandika mama yake kuwa msimamizi mkuu wa watoto wake kisheria,"alisema mwanasheria huyo aitwaye Blanca.

Wakati huo huo mtengeneza muziki mkongwe Quincy Jones amesema anaweza asihudhurie mazishi ya Michael Jackson.

Jones ambaye alimtengenezea Michael albamu tatu ambazo ni Thriller, Off the Wall na Bad, bado yupo katika huzuni kubwa kutokana na kifo hicho cha ghafla cha rafiki yake Michael Jackson.

Serikali ya Marekani imeingia katika zoezi la uchunguzi wa kifo cha Michael Jackson ambapo itawachunguza madaktari waliohusika na Michael, jinsi wanavyofanya kazi na vyanzo vyao vya kupata madawa.