FROM COAST

Ahmed Ghailani amepelekwa kukabiliana na mashtaka katika mahakama ya New York akihusishwa na uripuaji wa mabomu wa balozi za Marekani katika Afrika Mashariki.

Bwana Ghailani, Mtanzania, alikamatwa nchini Pakistan mwaka 2004. Anatazamiwa kufikishwa kwa mara ya kwanza katika mahakama ya Manhattan baadae siku ya Jumanne.

Alipelekwa Guantanamo akiwa pamoja na mahabusu wengine wanaoitwa "muhimu sana" mwishoni mwa mwaka 2006.

Kuhamishwa kwake kumekuja huku Rais Obama akiwa katika hekaheka za kutafuta utekelezaji wa ahadi yake aliyoitoa wakati wa uchaguzi ya kufunga gereza la Guantanamo Bay katika kipindi cha mwaka mmoja akiwa madarakani.

Waandishi wa habari wanasema kesi ya Bwana Ghailani litakuwa jaribio muhimu katika mipango ya utawala wa Obama kufunga gereza hilo na hatimaye kuwafikisha mbele ya sheria watuhumiwa.

Serikali ya Marekani ina matumaini ya kuwasafirisha baadhi ya watuhumiwa wengine katika baadhi ya nchi, lakini hadi sasa mashauriano juu ya hilo yamekwama hasa iwapo Marekani nayo ipo tayari kupokea mahabusu.

Baraza la Congress lilikataa maombi ya serikali ya kugharamia kufungwa gereza la Gauantanamo, kukiwa na upinzani mkali wa kuwapeleka watuhumiwa Marekani.

Hali ya afya ya mtoto Comfort Kimaro, 7 wa Mbezi Saranga Jijini Dar bado haijatengemaa na anaendelea kuuguzwa katika Hospitali ya Tumbi wilayani Kibaha kutokana na majeraha mabaya ya moto yaliyotokana na kile kinachodaiwa kuwa ni kuunguzwa moto na mke wa baba yake mdogo.

Taarifa zinadai kuwa mtoto huyo, aliunguzwa mwilini kwa mkasi wa moto na mke wa baba yake mdogo anayetajwa kwa jina la Domina Kimaro, kutokana na kosa la kula chakula kilichokuwa kimehifadhiwa kwa ajili ya msichana wa kazi almaarufu kama hausigeli.

Inaelezwa kuwa Comfort ameunguzwa kwa kutumia mkasi uliokuwa ukiwekwa kwenye mafuta ya moto na mke huyo wa baba yake mdogo (Domina) na kisha kupitishiwa mwilini mwake mara kadhaa kwa ni ya kumuadhibu.

Taarifa zinadai kuwa tukio hilo limejiri hivi karibuni, mishale ya saa 4:00 usiku baada ya kubainika kuwa mtoto huyo alikula chakula cha msichana wa kazi.

Imeelezwa kuwa siku ya tukio, mama huyo (Domina) alipandwa na hasira aliposikia kuwa Comfort amekula chakula cha msichana wa kazi na kuamua kuchukua hatua hiyo ya kumuunguza mwilini kwa mkasi uliokuwa ukichemshwa kwenye mafuta ya moto na kumbabua mwilini tena na tena.

Kamanda wa Mkoa wa Kipolisi wa Kinondoni, Mark Kalunguyeye, amesema polisi wanamshikilia mtuhumiwa Domina na kesho wanatarajia kumpandisha kizimbani.

Aidha, akizungumza na waandishi wa habari, Afisa Habari wa Shirika la Elimu Kibaha, ambaye pia ni Afisa uhusiano wa Hospitali ya Tumbi Bw. Gerald Chami, amesema hali ya Comfort bado haijawa nzuri na hivyo anaendelea kulazwa ili apate matibabu zaidi.

Taarifa zaidi zinaeleza kuwa majirani ndio waliomfikisha mtoto huyo hospitalini baada ya kumtwaa toka kwa Bi. Domina aliyekuwa ameshamuunguza mwilini bila huruma na kumuacha ndani pasi na kumpeleka jospitalini.

Mjumbe mmojawapo wa eneo hilo la Mbezi Saranga, Bw. Christopher Francis, amesema kuwa siku ya tukio, mtoto huyo alikuwa akipiga kelele nyingi za kuomba msaada.

Akasema majirani walipojaribu kwenda kumsaidia, wakashindwa kwa vile Domina alikuwa ameufunga mlango wa nyumba na kuendelea kumuadhibu akiwa ndani.

Hata hivyo, akasema yeye na majirani wengine wakaenda tena siku nyingine na kufanikiwa kumpata mama aliyefanya ukatili huo ambaye kazi yake ni kupika na kuuza chakula katika eneo la Saranga Temboni.

Akasema baada ya kumpata walimuhoji kuhusina na adhabu hiyo, lakini mama huyo akakana kuwa hakumuunguza.

Akasema baada ya kuona mama huyo anakwepa tuhuma, walimua kumuhoji msichana wa kazi wa mama huyo ambaye ndiye aliyetakiwa kula chakula kile kinachodawa kuliwa na mtoto Comfort.

Mjumbe huyo wa shina akasema msichana huyo wa kazi ndiye aliyefichua kuwa mtoto huyo alichomwa na mama yake mdogo kwa kutumia mkasi uliokuwa ukilowekwa kwenye mafuta ya moto.

Bw. Fransis akasema kwa kushirikiana na wananchi, waliamua kutoa taarifa Polisi na mama huyo akapelekwa kituoni kwa ajili ya kutoa maelezo zaidi.

Akasema baadaye majirani waliamua kuchangishana fedha na kupata zaidi ya shilingi 60,000 walizozitumia kumpeleka mtoto Comfort katika hospitali ya Tumbi, ambako hadi sasa anaendelea kutibiwa.

Aidha, alipohojiwa, Comfort amesema mama yake mdogo alikuwa na tabia ya kumpiga mara kwa mara, hasa baba yake mdogo aitwaye Geofrey Kimaro anapokuwa safarini.

Akasema siku ya tukio baba yake mdogo alikua safarini na hakupewa chakula tangu asubuhi hadi jioni na ilipofika mishale ya saa 10:00 jioni, mama yake mdogo alimpa chakula ili akipeleke nyumbani kwa msichana wao wa kazi.

Akasema kwa vile yeye (mtoto) alikuwa na njaa kutokana na kuwa alikuwa hajala chochote, aliamua kukila na ndio maana akajikuta akiunguzwa moto kwa kosa hilo.

Akasema mama huyo alimuunguza kwa kutumia mkasi alioukuwa akiuloweka kwenye mafuta ya moto.

Hata hivyo, akasema baada ya kuunguzwa huko, mama yake mdogo (Domina) hakumpeleka hospitali na badala yake akawa anampaka yai, hali iliyomfanya awe akipata maumivu makali zaidi.

Kwa upande wa mama mzazi wa mtoto huyo Elinani Lalashowi, 36, mkazi wa Moshi ambaye alifika juzi kumuuguza mwanawe baada ya kupata taarifa kutoka kwa shemeji yake aitwae Vicent, amesema hana la kuongea kwa sasa kwani hakuwahi kuwa na ugomvi wowote na mke huyo wa shemeji yake.

Moto mkubwa umelipuka katika jengo la Golden Sand lililopo kwenye Mtaa wa Karume pale Oysterbay Jijini na kusababisha mali zenye thamani ya mamilioni ya fedha kuteketea.

Kamanda wa Mkoa wa Kipolisi Kinondoni, Mark Kalunguyeye, amesema moto huo ulianza jana mishale ya saa 1:00 asubuhi na kuunguza chumba kimoja cha jengo hilo, ambalo ni mali ya Bw. Fidar Hussein.

Amesema chumba namba tisa cha jengo hilo ambacho kinatumika kama jiko, ndicho kilichoteketea kwa moto uliounguza vitu tele vilivyokuwamo ndani.

Kamanda Kalunguyeye amesema miongoni mwa vitu vilivyoteketea kwa moto ni pamoja na jokofu moja kubwa lililokuwa ndani ya chumba hicho.

Akasema chanzo cha moto huo ni hitilafu ya umeme na kwamba thamani ya mali iliyoteketezwa na moto huo bado haijafahamika.

Kwa mujibu wa Kamanda Kalunguyeye, moto huo ulizimwa na Kikosi cha Zimamoto cha Halmashauri ya Jiji la Dar es Salaam kwa kushirikiana na wananchi wa eneo hilo.

Mwanamke mmoja Jijini ameuawa kinyama kwa kuchinjwa na kisha kichwa chake na kiwiliwili kutengenishwa.

Inadaiwa mwanamke huyo ameuawa na mtu anayedaiwa kuwa ni mume wake.

Tukio hilo la mauaji ya kinyama, linadaiwa kutokea jana katika maeneo ya Kigogo Jijini.

Taarifa ambazo Alasiri imezipata, zinaeleza kuwa aliyetekeleza mauaji hayo ya kinyama ni mume wa mwanamke huyo ambaye alitoroka baada ya tukio.

Hata hivyo, majina ya marehemu na mtuhumiwa wa mauaji hayo hayakuweza kuthibitishwa.

Aidha, taarifa zaidi zimedai kuwa chanzo cha mauaji ya mwanamama huyo anayedaiwa kuacha watoto wawili ni wivu wa kimapenzi.

Hata hivyo, Mwandishi alipojaribu kumsaka Kamanda wa Mkoa wa Kipolisi Kinondoni, Mark Kalunguyeye, ili aelezee tukio hilo, hakuweza kupatikana kupitia simu yake ya mkononi.

Naye Kamanda wa Polisi katika Kanda Maalum ya Dar es Salaam, Suleiman Kova, alisema hajapata taarifa za tukio hilo.

Aliposakwa tena Kalunguyeye, mtu aliyepokea simu alidai kuwa Kamanda Kalunguyeye alikuwa ameelekea katika hosteli za Chuo Kikuu cha Dar es Salaam pale Mabibo ambako kulitarajiwa kufanyika mkutano wa Kamati ya Ulinzi ya Mkoa na Uongozi wa Chuo hicho.